Jab se aaye tum jeevan me kuch naya naya sa lagta hai
Mere jeevan ke upvan me tumhara mukhda hi sajta hai
Ye komal se do kamal nayan ye chchoti si muskaan
Ye jeeven sarita thi tapt meri, tumne diya ise jeevan daan
Ye mukhchandra pe khilkhilati hansi tumhari
Athkheliyaan mere ank me jo lagti badi pyaari
Chamchamati tumhari aankhon me jab mujhe chchaya apni dikhti hai
He mere jeevenadhaar mujhe ye duniya sajeeli lagti hai
Kabhi na dekha aise khud ko, Kabhi na aise jaana tha
Hota hai maatritva ka aanand kya ye maine bhala kab jaana tha
Ab dekhu jahan bhi duniya me sab bhala bhala sa lagta hai
Jab se aaye tum jeevan me kuch naya naya sa lagta hai
Ye narm tumhare haath jab mere mukh ko sehlaate hain
Sach kehti hu mere prempushp mujhe ye ankaha sa sukh de jaate hain
Apnatva aur mamta ki garima ka tumne matlab samjhaya hai
Tumhe paakar mere kalpavriksha maine pure sansaar ko paaya hai
Ansamjhi anjaani tumhari bhaasha, mujhe jaane kya kya keh jaati hai
Meri saari shabdon ki duniya bas ik tumpe simat jati hai
Bholi bhaali kaaya tumhaari kanchan sam manbhbaavan lagti hai
Us par ye kaajal ki bindiya manmohak badi hi fabti hai
Purnachandra sa shobhit ye mukh bada suhana lagta hai
Jab se aaye tum jeevan me kuch naya naya sa lagta hai
Usha ki nam kiranein jab haule se tumhe jagati hain
Tumhe nahi maalum ye dekh meri aankhein kitna sukh paati hain
Varshajal sa nirmal tumhara tan Gangajal se paavan hai
Tum ho puraskaar mere punyo ka kehta mujhse mera ye man hai
Mere adhure jeevan ko tumne hi to aakar purna kiya
Adhbana tha chitra mere sukh ka tumne hi to use sampoorna kiya
Mil gayi khushi saare jag ki, ab nahi bachi koi ichcha hai
Jab se aaye tum jeevan me kuch naya naya sa lagta hai
Ho kendra bindu tum mere jag ka tum hi to mere praan ho
Srijit kiya tumhe maine, tumhi mere dukho ka traan ho
Ye manohaari chchavi jo mere dil me bas gayi lagti hai
Wah hai tumhare Pita ki pratichchaya jo har pal mujhme basti hai
Ho tum prateek mere prem ka jise dil se maine sinchit kiya
Di maanyata mere prem ko tumne, mahima se use abhimandit kiya
Kiya tumne mujhko pura, Maata banne ka mujhe sukh diya
Aur kahu kya tumse he Paavan, tumne jeevan ko naya roop diya
Kaise baandhun bhaavo ko shabdo me, ye mujhe to asambhav lagta hai
Jab se aaye tum jaaven me sab naya naya sa lagta hai........
Sab naya naya sa lagta hai.........
Sab naya naya sa lagta hai............
No comments:
Post a Comment