Soone is Man ki Bagiya me
Andhiyaari is gum ki Duniya me
Deep prem ke kaise jalaun
Geet preet ke kaise gaaun?
Door lage ab mujhe kinara
Beech dhaar me kahan sahara
Dolti jeevan ki is naiyya ko
Kaise ab main paar lagaun?
Geet preet ke kaise gaaun?
Khaali lage saavan ke jhoole
Yaadon ko koi kaise bhoole?
Unhi yaadon ke dansh sahu main
Kaise tujhe is dil se bhulaun?
Geet preet ke kaise gaaun?
Pal pal mujhe ek hook sataye
Dil paagal mera mujhe jalaye
Van upvan me dolun jogan si
Kaise phir wo aas jagaun?
Geet preet ke kaise gaaun?
Jo tha mera wo kal wo tum the
Jo hota wo kal bhi tum the
Par aaj chchod gaye tum mujhko
Kaise is man ko samjhaun?
Geet preet ke kaise gaaun?
Lambi hai raah jeevan ki
Bujhi nahi trisha tan man ki
Mera to sarvasva tumhi the
Mere praan tyaagkar kahan main jaaun?
Geet preet ke kaise gaaun?
Chaandani ab nahi suhati hai
Koyal ki kuk kahan lubhaati hai?
Kadwe lagte hain saare geet
Unhe adharon par kaise sajaun?
Geet preet ke kaise gaaun?
Vishbujhi lagein logon ki nazarein
Phande se lagein phoolon ke gajare
Gehane bediyon se ab lagte hain
Kaise khud ko kaidi main banaun?
Geet preet ke kaise gaaun?
Aankhon ke sapne chchoot gaye
Dil ke darpan bhi toot gaye
Un bikhari kaanch ki kirachon ko
Kaise apne haathon se uthaun?
Geet preet ke kaise gaaun?
Prem ke rang ho gaye ab ojhal
Marta hai mera man ye pal pal
Tirti jaati hu gum ki leharon par
Kaise khud ko is se bachaun?
Geet preet ke kaise gaaun?
Jaanti hu tum nahi lautoge
Mere beete pal waapis na doge
Par chalte jaana hi jeevan hai
Yahi sochlar chalti jaaun
Par geet preet ke kaise gaaun?
Geet preet ke kaise geeun?
Geet preet ke kaise gaaun?
Geet preet ke kaise gaaun?
No comments:
Post a Comment